Guovdageainnu nuppástuhttinprográmma ovttasbarggu čađa eaktodáhtolašguovddážiin Ábasiin álggahit dál fáttarortnega mii galgá veahkehit ođđa ássiid oahpásnuvvat buorebut Guovdageainnu fálaldagaiguin.
Fáttarortnet doaibmá dainna lágiin ahte ođđa ássit sáhttet dieđihit eaktodáhtolašguovddážii ahte háliidit fáddara, ja báikkálaš olbmot geat háliidit fáttariin maiddái dieđihit eaktodáhtolašeguovddážii dan birra. Dastto juhkkojuvvo fáttar ođđá ássái, gii galgá sávvat ođđá ássái bures boahtima ja veahkehit su oahpásnuvvat Guovdageainnu gilážiiguin.
- Jus dieđihat iežat eaktodáhtolažžan dása, de lea bargun váldit oktavuođa muhtiniin gii fárre deike, bovdet dan olbmo dahje bearraša mielde muhtin somás doaimmaide ja áinnas muitalit Guovdageainnu suohkana birra ja veahkehit su oahpásnuvvat Guovdageainnuin.
Ávžžuhit searvat
Prošeavttas mas fáttarortnet lea oassin, lea ulbmiliin nannet ássanmovtta, ja erenoamážit leat veahkkin ođđa ássiide oahpásnuvvat siinguin geat orrot dáppe ja fálaldagaiguin mat dáppe leat.
Eaktodáhtolašguovddáš Ábas bargá olu koordinerenbarggus fáttarortnega oktavuođas, ja jođiheaddji Risten Elle Siri ávžžuha olbmuid searvat dása.
- Mii háliidat fáddariid ja ođđa ássiid buot agiin. Dát ortnet heive buohkaide - ja sihke mánát, nuorat, rávisolbmot ja vuorasolbmot sáhttet searvat. Mii dahkat dan buoremusa geahččalit gávdnat fáddariid ja ođđa ássiid geain leat sullii seamma beroštumit ja ahki, nu ahte šaddá goappašagaide somás vásáhus, lohká son.
Intropáhka oasit
Intropáhkas, mas fáttarortnet lea oassin, leat maiddái eará doaimmat mat čavčča mielde bohtet čađahuvvot. Dán prošeavttas lea Anne Maret Sara Lango bargan prošeaktajođiheaddjin, ja Ovddos bovde ođđa ássiid searvat daid iešguđet doaimmaide mat leat plánejuvvon. Ulbmiliin lea oláhit ođđa ássiid, ja doaimmat čađahuvvot eanas eahkediid dan dihte vai bargoolbmot ja sii geat vázzet skuvllaid, maid besset searvat.
- Intropáhkas leat oasit nugo ássiidkafeja Diehtosiiddas, jođánis sámegielkursa mii čađahuvvo ovttasbarggu čađa SOL:ain, historjádiibmu museas ja galledit min iešguđet almmolaš ásahusaid oahpásnuvvandihte Guovdageainnu fálaldagaiguin. Dasa lassin lea giđđat lágiduvvon beaivi ovtta min priváhta aktevrraid luhtte suohttasa váste, gos guossit besse njorostallat, herggiin vuodjit ja njálgga biepmu borrat. Dat oassi maid čađahuvvo plána mielde fas boahtte giđa, muitala Ovddosa jođiheaddji Ann Catharina Lango.
Son lohka maid ahte jus olbmuin lea beroštupmi gullat eambbo dán doaimma birra, de lea beare váldit oktavuođa Ovddosiin.
Hálidat go fáddara dahje sáhtášit go leat fáttar?
Leat go aitto fárren Guovdageainnu suohkanii ja hálidivččet oahpásnuvvat buorebut báikkiin, olbmuiguin ja fálaldagaiguin? Váldde oktavuođa Abas eaktodáhtolašguovddážiin ja dasto sáhtát boahtit oktavuhtii fáddariin.
Du fáttar sáhttá dutnje muitalit báikki birra, fálaldagaiguin, ja čajehit min guovlluid.
Váldde maid oktavuođa Ábasin jus don orut Guovdageainnus ja sáhtášit leat fáttar.
Oktavuođadieđut:
Abas frivilligsentral
Risten Elle Siri
Tlf.nr: 482 09 543
E-post: abas.frivillig@gmail.com