Mii lea du mielas dehálaš boahtteáiggi Guovdageidnui?
Bargu Guovdageainnu suohkana ođđa strategalaš ealáhusplánain lea bures jođus. Maŋimus mánuid lea Ovddos čađahan jearahallamiid, čoahkkimiid ja bargobájiid ealáhusaiguin, boazodoaluin, organisašuvnnaiguin, nuoraiguin, almmolaš aktevrraiguin ja eará guovddáš berošteddjiiguin.
Áigumuš lea ráhkadit strategalaš ealáhusplána mii addá geainnu dasa movt Guovdageaidnu galgá ovdánahttit eanet bargosajiid, nannet ealáhuseallima ja láhčit dili geasuheaddji ja ceavzilis báikkálašservodahkii boahttevaš jagiid.
Dán rádjai lea bargu eanaš leamaš njuolggo gulahallama bokte iešguđet joavkkuiguin ja oassálastiiguin. Dát lea addán ollu mávssolaš árvalusaid, muhto Ovddos:ii lea maid dehalaš ahte proseassa lea rabas ja ja ahte nu oallugat go vejolaš, oassálastet. Ovddos diehtá ahte leat ollu buorit perspektiivvat ja jurdagat maiddái daid joavkkuid olggobealde maid Ovddos ii leat jearahallan dahje bovden bargobájiide.
Olles servodat galggašii searvat
Beroškeahttá das leatgo don ássi, ealáhusdoalli, bargi, studeanta, nuorat, penšunista dahje ovddastat go organisašuvnna, de háliida Ovddos gullat maid don oaivvildat Guovdageainnu boahtteáiggi birra.
Erenoamážit hálida Ovddos gullat:
Mat leat Guovdageainnu stuorámus girvodagat?
Makkár hástalusaid berret dustet?
Makkár vejolašvuođaid berret mii vuoruhit boahtte 10 jagis?
Mii galgá leat sajis vai eambbogat háliidit ássat, bargat ja álggahit fitnodaga Guovdageainnus?
Maid galgat dáhkat ovdánahttindihte ealáhusaid ja servodaga?
Makkár lea lihkostuvvan Guovdageaidnu 2036:s?
Cealkámušat geavahuvvojit oassin máhttovuođđun strategalaš ealáhusplánii, oktan jearahallamiiguin, bargobájiiguin, statistihkain ja eará kártemiin.
Juogat iežat árvalusaid
Ovddos sávvá ahte geavahat moadde minuhta vástidit gažadanskovi.
Jus háliidat buktit eanet dárkilis árvalusaid, jus dus leat gažaldagat barggu birra dahje jus háliidat digaštallat fáttáid mat gusket ealáhusovdáneapmái Guovdageainnus, de leat don maid váimmolaččat bures boahtin váldit njuolggo oktavuođa Ovddosin. Buot perspektiivvaid ii sáhte čoahkkáigeassit ovtta skovvái, ja Ovddos áinnas váldá vuostá árvalusaid ja mearkkašumiid mat sáhttet addit buoret mearridanvuođu.
Strategalaš ealáhusplána galgá leat veahkkeneavvun olles Guovdageidnui. Mađi eanet jienat mat bohtet ovdan proseassas, dađi buoret vuođđu šaddá daidda válljejumiide mat galget dahkkojuvvot boahtteáiggi ealáhusaid ja servodatovddideami ektui.
Comments