Internašunála nissonbeaivvi oktavuođas leat mii Ovddosis hupman muhtin min čeahpes fitnodatjođiheddjiin geat leat leamaš mielde SMB-ovdánahttinprogámmas maid Ovddos lea initieren.
Anne Laila P. Skum. Foto: Árvu
Ii galggašii leat jearaldat lea go dákkár beaivái dárbu, go dákkár beaivvit leat dehálaččat čalmmustahttit dan ahte nu mo otná duohtavuohta lea, ii leat riekta.
Nissonbeaivi ásahuvvui 1977:s ON bokte čalmmustahttindihte nissoniid váibmoáššiid ja rivttiid- muhto manne lea dat ain nu dehálaš odne, 45 jagi maŋŋil? Dat lea juoga das maid leat hupman Anne Laila P. Skumain, gii lea Goldin AS beaivválaš jođiheaddji. Sunnje lea alcces dát beaivi erenoamáš, sihke danne go lea njukčamánu 8. beaivvi riegádahttán máná - muhto maiddái go dát beaivi lea su mielas dehálaš čalmmustahttindihte dásseárvvu.
- Go geahččá Norgga ja máilmmi fitnodagaid, de oaidná dávjá ahte seamma máhttu ja virgi addá nissoniidda ja dievdduide goabbatlágan sisaboađu. Ja dađi bahabu lea nu ahte nissonat dávjá ožžot unnit bálkká go dievddut. Ii galggašii leat jearaldat lea go dákkár beaivái dárbu, go dákkár beaivvit leat dehálaččat čalmmustahttit dan ahte nu mo otná duohtavuohta lea, ii leat riekta. Seamma bargu galggašii addit seamma bálkká, ja go eat leat joavdan nu guhkás 2022:s, čájeha dehálašvuođa dákkár čalmmustahttinbeivviin, lohká son.
- Sáhka dásseárvvus
Son ii ieš nu čuovvul "ovttadássásašvuođa" sáni, ja oaivvilda dásseárvvu buorebut čilget manne nissonbeaivi lea dehálaš. Lea easka dalle go nissoniin ja dievdduin lea seamma árvu, ahte nagodat servodaga valljodaga geavahit buoremusat.
- Nissoniid ja dievdduid gaskkas leat sohkabealálaš erohusat - muhto juste dás lea sáhka das ahte nissoniin ja dievdduin galgá leat seamma árvu. Lea sáhka dásseárvvus. Jus bargat ovttas ja geavahat resursaid doaibmilit, de olahat guhkáš, lohká son.
Progámma nannet fitnodagaid
Ovddos lea dál geargan SMB-ovdánahttinprográmmain mas Goldin AS fitnodat lea searvan ovttas 15 eará fitnodagaiguin. Ulbmiliin ovdánahttinprográmmain lei árvolokten ja eanet bargit daid 16 Guovdageainnu fitnodagaide geat ledje mielde prográmmas. Prošeavttas lea Integralis AS beaivválaš jođiheaddji Olga Goldfain, bargan prošeaktajođiheaddjin. Anne Laila ja sin fitnodat leat hui duđavaččat bohtosiidguin maid prográmma lea addán dássážii, ja rámpo prošeaktajođiheaddji áŋgiruššama ja čehppodaga.
- Min fitnodahkii lea prográmma leamaš erenoamáš dehálaš gelbbolašvuođa dáfus. Mii leimmet joavdan dan dássái gos eat šat nagodan iežamet gelbbolašvuođain áktánasat ovdánit, ja prográmmas leat máilmmi čeahpes bagadallit geat leat čehpet veahkehan min dainna masa dárbbašeimmet veahki. Ii leat nu álki hábmet ohcamiid struktuvrralaččat, ja ovdal prográmma mis ledje 4-5 beallemuddui čállon ohcama. Olga lea leamaš čeahppi ja lea nagodan struktureret ja muddet barggu, ja seammás oaidnit mo galgat boahtte lávkki olahit. Mii oaidnit ahte dat veahkki maid leat ožžon, lea dahkan ahte nagodat olahit daid mihtuid maid leat bidjan, muitala Anne Laila rahpásit.
Odne háliidat erenoamážit gudnejahttit nissonlaš fitnodatjođiheddjiid ja fitnodatálggaheddjiid, ja danne sávvat lihkku nissonbeivviin. Seammás sávvat Anne Lailai lihkku fitnodatovdánahttimiin ja ásahemiin!
Comments