Ovddos lea virgádan ođđa mielbargi, Máret Risten Eira Karlsen, gii ovdal lea bargan ergoterapevttan Guovdageainnu suohkanis.
Máret Risten álggii bargat prošeaktakoordináhtoriin 7. beaivvi borgemánus. Su bargu lea earet eará meannudit doarjjaohcámušáid ja muđui maiddai koordineret eara prošeavttaid maid Ovddos lea álggahan.
Máret Ristena duogáš lea dearvvašvuođasuorggis ja lea guhká bargan ergoterapevttan. Máŋemus 3,5 jagi lea bargan suohkanergoterapevttan Guovdageainnus. Ovdal go fárrii bearrašiin Álttás Guovdageidnui barggai son badjel logi jagi ergoterapevttan Helsepartner Davvi Norgga rehabiliterenguovddážis. Máret Risten lea Guovdageaidnulaš ja lea bajásšaddan boazodoalus.
- Dál illudan álgit bargat ođđá hástalusáiguin, muhto ergoterapevtta jurddašanvuohki čuovvu mu vaikko barggut leat eará go dat maidda lean hárjánan. Mu mielas lea dehálaš ahte buot olbmuide lea vejolaš oasálastit servodagas ja geavahit servodaga bálvalusáid ja fálaldagaid vaikko makkar funkšuvdna olbmos lea, dadjá Máret Risten.
Máret Ristena mielas lea dehálaš ahte Ovddos oidno Guovdageainnu servodagas ja ahte olbmot fuomášit makkár vejolašvuođat dán dehálaš barggus leat
Mii leat ilus go Máret Risten lea boahtán Ovddos-team'ai ja sávvat son loaktá barggus.