top of page
Search

Guovdageaidnu almmuha sierra ássiid-appa

Olahandihte assiide, almmuha suohkan dál sierra ássiid-appa Guovdageidnui. Appas leat stuora geavahanviidodat – ja addá buriid vejolašvuođaid sihke ássiide, servviide, suohkanii ja gussiide Guovdageainnus.



Guovdageainnu suohkan lea movttet juogadit iežas assiidguin dan ođđasa ahte dál lea almmuhuvvon Guovdageidnui sierra ássiid-appa. Ássiid-appai čohkkejuvvot buot relevánta dieđut seamma vuogádahkii, ja galgá doaibmat dego gulahallankanálan sihke suohkana ja assiid gaskkas, ja assiid ja servviid gaskkas.


Olles suohkanii

Appa lea ođđa ja speanttas vuohki gulahallat ássiidguin, mainna dus earret eará lea vejolašvuohta oažžut “push-dieđu” njuolga iežat mátketelefuvdnii go suohkanis leat dehálaš dieđut ássiide, dahje jus servviin main don beroštat – leat ođđasat maid juogadit appas.


Appas don oaččut vejolašvuođa válljet justte daid surggiid main beroštat – nu go ovdamearkka dihte valáštallan ja kultuvra. Oaččut maid vejolašvuođa válljet servviid main beroštat, ja báikkiid suohkanis gos erenoamážit háliidat oažžut ođđasiid push-dieđu bokte.


Buoret ollislašgova fálaldagas

Dát ortnet addá vejolašvuođa buoret ollislašgovvii Guovdageainnu fálaldagas, go ulbmiliin lea čohkket ovtta appai visot dieđuid dan birra mii Guovdageainnu suohkanis fállojuvvo - ja maiddái mii Guovdageainnu suohkanis geavvá áiggis áigái.


Dat mearkkaša ahte ássiid-appas don gávnnat dieđuid earret eará dáid birra; čuoiganláhtuid, bearralmátkiid, hárjehallamiid, teahterčájálmasaid, iešguđetlágan kurššaid, duodjemárkaniid, beassášmárkaniid ja eará doaluid.


Appas lea hui rabas vejolašvuohta čohkket dieđuid justte dan birra maid Guovdageainnu suohkana ássit ja searvvit háliidit – ja dan dihte lea olu ássiid, servviid ja suohkana duohken nannet appa buorren reaidun buohkaide!


Mun doaivvun ahte dát áhta šaddá dakkár reaidu mii nanne gulahallama suohkana ja álbmoga gaskka ja mii dagaha ahte eanebut ožžot buoret ássanmovtta go olbmot ožžot eanet dieđu dan birra mii dáhpáhuvvá suohkanis ja makkár fálaldagat mis leat gielddas, lohká sátnejođiheaddji Anders S. Buljo.

 

Eambbo oidnosii Guovdageainnu suohkana servviid

Nu go odne lea – de juhket olu searvvit dieđuid iežaset fálaldaga ja doaluid birra arenain nu go Facebook-ruovttusiidduin ja diehtojuohkintávvaliin. Dat sáhttá dagahit ahte vejolaš berošteaddjit dahje oasseváldit eai oaččo daid dieđuid maid dárbbašivččet, rievttes áigái, ja dan geažil manahit ovdamearkka dihte doaluid maidda livččet háliidan searvat.


Dán appas sáhttet buot searvvit ráhkadit sierra “konto”, ja dan bokte juohkit dieđuid iežaset fálaldagas ja doaluin. Dainna lágiin lea appa mielde oažžume Guovdageainnu servviid eambbo oidnosii.


Gulahallan suohkana ja assiid gaskkas

Appa čađa sáhttá suohkanorganisašuvnda maid juohkit dehálaš dieđuid iežas ássiide. Jus ovdamearkka dihte leat revrebarggut mat dagahit ahte čázi fertejit steŋget muhttin báikkis suohkanis, de sáhttá suohkan njuolga appa čađa sáddet push-dieđu dan birra ássiide geaidda dat diehtu lea relevánta.


Ovttasbargu nuppástuhttinprográmmain – Ovddosin

Assiid-appa ásaheapmi lea ovttasbargu suohkana ja nuppástuhttinprográmma Ovddos gaskkas, ja lea Innocode gii ráhkada appa.


Álgojurdda ásahit deike sierra ássiid-appain vulggii prošeavttas maid nuppástuhttinprográmma lea bidjan johtui dainna ulbmiliin ahte nannet geasuheaddjivuođa Guovdageainnu orrunbáikkis. Ássiid-appa ásaheapmi lea okta golmma oasis dán prošeavttas – ja gullá oassái mas ulbmiliin lea láhčit dili dasa ahte ássiin galgá leat álki oažžut ollislašgova fálaldagas ja álki leat gávdnat dieđuid.


Mii leat bargan dáinna appain máŋggaid jagiid ja viimmat beassat almmuhit dan, dat lea hui somá. Sávan eaktodáhtolaš searvvit váldet atnui dán appa ja almmuhit iežaset lágidemiid dán appai, mađi eambbo lea anus dađi buoret šadda maid sisdoallu. Boahtteáiggis soaitá dát maid šaddat ávkin suohkana fitnodagaide, dadja Ovddosa Beaivválaš jođiheaddji Ann Catharina Lango

 

Oza “Kautokeino innbygger” App Store dahje Google Play’as iežat smarttelefuvnnas. Dahje govve QR-koda vulobealde.



Recent Posts

See All

留言


bottom of page